Алматыда 20-23 тамыз аралығында тревел-блогерлерге, журналистерге, инфлюенсерлерге және туризм индустриясының мамандарына арналған ірі халықаралық алаңдардың бірі – TBEX Asia 2026 өтіп жатыр, деп хабарлайды QazMonitor Алматы әкімдігінің баспасөз қызметіне сілтеме жасап.
Қалаға әлемнің әр түкпірінен 250-ден астам автор мен сала өкілі келді. Олардың жалпы аудиториясы шамамен 300 млн адамды қамтиды
Бірнеше күн бойы Алматы жаһандық медиа алаңға айналып, Қазақстанды әлемнің түкпір-түкпіріндегі миллиондаған әлеуетті саяхатшыға тікелей таныстыруға мүмкіндік алып отыр. TBEX-тің әр қатысушысы – шетелдік аудиториямен байланыс орнататын дербес ақпарат арнасы. Олар Instagram, TikTok, YouTube, Facebook, Pinterest, Snapchat, блогтар, подкасттар және онлайн-БАҚ арқылы контент таратады.
Форум барысында Алматыда жасалған контент іс-шара аяқталғаннан кейін де қала мен Қазақстанның халықаралық танымалдығын арттыруға ықпал етеді.
TBEX қатысушыларының арасында миллиондаған аудиториясы бар авторлар да бар. Америкалық тревел-блогер Christopher Reese Joondeph (Authentic Traveling) әлеуметтік желілерде 3 млн-нан астам оқырман жинаған. Филиппиндік тревел-инфлюенсер әрі YouTube-креатор Wil Dasovich-тің Instagram желісінде шамамен 1 млн оқырманы бар. Ал «XXI ғасырдың Ибн Баттутасы» атанған мысырлық саяхатшы әрі тележүргізуші Ahmed Haggag-тың Instagram-дағы аудиториясы 1,3 млн-нан асады.
Осылайша, Алматы бір ғана жарнамалық науқан арқылы емес, әр елдегі аудиториясына саяхат туралы әңгімелейтін жүздеген тәуелсіз автордың контенті арқылы таныстырылып отыр.
Мұндай форматтың басты артықшылығы – Алматыны саяхатшылардың өз көзімен көрсету. Қонақтар туристік нысандарды аралап қана қоймай, өз бағыттарын қалыптастырып, фото және бейне түсіреді, жергілікті тұрғындармен тілдеседі, ұлттық тағамдармен танысады, таулы аймақтарды зерттеп, Қазақстан туралы әңгімелейді.
«Шынымды айтсам, Қазақстан туралы көп біле бермейтінмін. Бірақ әзірге алған әсерім өте жақсы. Тағамы керемет, ал адамдар өте мейірімді әрі ашық», – деді британдық тревел-блогер әрі экспедиция ұйымдастырушысы Уилл Хаттон.
22 және 23 тамызда Алматыда TBEX Asia 2026-ның негізгі іскерлік бағдарламасы өтеді. Оның аясында халықаралық сарапшылардың баяндамалары, тақырыптық сессиялар, туристік бағыттардың таныстырылымдары, кәсіби кездесулер мен нетворкинг ұйымдастырылады.
TBEX Asia 2026-ның Орталық Азияда алғаш рет өткізілуі әлемдік туризм индустриясының өңірге және Қазақстанға деген қызығушылығы артып келе жатқанын көрсетеді. Бүгінде Алматы туристер үшін тартымды бағыт қана емес, жаһандық travel-индустрияның маңызды тоғысатын орталығына да айналып келеді.
