Алматы Орталық Азиядағы ең дамыған мегаполистердің бірі ретінде туризм саласындағы өсімін жалғастыруда. 2025 жылдың үш тоқсанының қорытындысы бойынша қалаға 1 869 375 турист келіп, бұл көрсеткіш 2024 жылдың осы кезеңімен салыстырғанда 8,1 пайызға артты. Соның ішінде шетелдік туристер саны 563 мың адамға жетіп, 11 пайыз өсім көрсетті, ал ішкі туризм бойынша 1,3 миллионнан астам саяхатшы тіркеліп, 6,9 пайыздық өсім байқалды.
Негізгі елдерден келген қонақтар ағыны да айтарлықтай ұлғайған. 2025 жылдың тоғыз айында Ресейден келген туристер саны 124,2 мың адамды құрап, 5,7 пайызға өсті. Қытайдан келгендер легі 102,1 мың адамға жетіп, бірден 39,2 пайызға артты. Үндістаннан келген 85,6 мың турист 3,5 пайыз өсім көрсеткен. Сонымен қатар Түркия (28 670 адам, +9,1%), Корея Республикасы (18 535 адам, +17,5%), Германия (12 549 адам, +15,6%), Қырғызстан (12 356 адам, +18,9%), Өзбекстан (12 259 адам, +8,9%), Ұлыбритания (10 143 адам, +7,1%), Италия (7 637 адам, +28,5%), Сауд Арабиясы (6 750 адам, +5,2%), Малайзия (5 773 адам, +16,9%) және Франция (4 688 адам, +25,4%) Алматыға жол тартқан елдер қатарында көш бастап тұр.
Туристер легінің артуы қаланың инфрақұрылымды жаңғырту, сервис сапасын жақсарту және цифрлық шешімдерді енгізу бағытындағы жүйелі жұмыстарының нәтижесі болып отыр. Алматы саяхатшылар үшін қолайлы жағдай жасап, демалыс және іскерлік туризм бойынша өңірдегі жетекші бағыт мәртебесін нығайтып келеді.
Қаланың халықаралық аренадағы танымалдығы да артып отыр. 2025 жылы CNN Алматыны баруға ұсынылған бағыттар қатарына енгізсе, британдық The Telegraph оны «Орталық Азияның інжу-маржаны» деп атады. Ал Booking.com талдауы бойынша, Алматы Орталық Азиядағы ең жылдам дамып келе жатқан туристік бағыттардың ондығына енген.
Дереккөз: Алматы қаласының әкімдігі
