Гуанчжоу радио және теледидары Қазақстан аумағында «Make Friends in the Silk Road» атты халықаралық жобаның түсірілімін бастады. Деректі тревел-шоу форматында ұсынылатын бағдарлама Қазақстан мен Қытай арасындағы туристік және мәдени ынтымақтастықты дамытуға арналған, деп хабарлайды Kazakh Tourism.
Аталған жоба цифрлық платформаларда кеңінен танымал болып, миллиондаған көрермен жинаған «Гонконг жастары шекара маңындағы қалаларда» деректі жобасының жалғасы саналады.
Жобаға Қазақстан мен Қытайдан келген жас блогерлер қатысуда. Олар жеке тәжірибелері арқылы екі елдің туристік әлеуетін, мәдениетін, дәстүрлерін және қазіргі жастардың құндылықтарын таныстырады.
«Биыл біз Қытайдың ең ірі шаһарларының бірі – Гуанчжоумен туристік ынтымақтастықты нығайттық. Екі елдің туроператорлары арасында B2B-кездесулер өтті, ҚХР туристік индустриясы өкілдері үшін ақпараттық турлар ұйымдастырылды. Сондай-ақ Air Astana әуе компаниясы Гуанчжоу – Алматы бағытында тікелей әуе рейсін ашты. Қытай нарығындағы жүйелі жұмысымыз тұрақты өсімді көрсетіп отыр. Биылғы 11 айда Қазақстанға ҚХР-дан келген туристер саны 876 мыңнан асты. Ал өткен жылы бұл көрсеткіш 655 мың адамды құраған болатын. Мұндай жобалар Қазақстанның Азиядағы негізгі туристік нарықтардың біріндегі қатысуын кеңейтуге мүмкіндік береді», – деді «Kazakh Tourism» ҰК» АҚ басқарма төрағасының міндетін атқарушы Даниел Сержанұлы.
Қазақстандағы түсірілімдер Алматы мен Астананың негізгі туристік және мәдени нысандарын қамтиды. Алматыда шығармашылық топ қалалық орта, гастрономиялық мәдениетпен танысып, Шымбұлақ тау-шаңғы курортына барды. Ал Астанада жоба шетелдік аудиторияға елорданың заманауи сәулеті, серпінді дамуы мен инфрақұрылымын таныстырады.
