Әлемге әйгілі The Washington Post басылымы Маңғыстау облысының табиғи ландшафттарына арналған материал жариялады. Мақалада Қазақстанның батысындағы бірегей туристік нысандар Жібек жолының айға ұқсас пейзаждары ретінде сипатталған, деп хабарлады QazMonitor-ға Kazakh Tourism.
Материал авторы Маңғыстауға жасаған сапары барысында өңірдің табиғи ерекшеліктеріне тоқталып, шетелдік оқырман назарын Бозжыра шатқалына, Торыш немесе Шарлар алқабына және Жығылған ойпатына аударған.
«Торыш немесе Шарлар алқабы - ландшафт бойына уақ тастардан бастап ірі валундарға дейінгі жүздеген домалақ тастар шашырай орналасқан орын. Ғалымдар олардың қалай пайда болғаны жөнінде әлі күнге дейін ортақ пікірге келген жоқ. Ал мен алқап бір кездері құдайлардың ойын бөлмесі болған деген жергілікті теорияны құптаймын. Жығылған - ұзындығы бірнеше шақырымға созылатын, ғимараттармен шамалас тастарға толы ойпат. Алыстан қарағанда, бір кездері Каспий теңізінің жағасында бір алып отырып, астындағы жерді ойып кеткендей әсер қалдырады», - деп жазады The Washington Post.
Материалда оқшауланған әрі аутентикалық саяхат түрлеріне қызығушылық танытатын туристер үшін Маңғыстаудың тартымдылығы ерекше екені атап өтілген. Автор өңір табиғатының бастапқы қалпын сақтауы мен адам қолы аз тиген кеңістіктерін басты артықшылық ретінде көрсетеді.
Сарапшылардың пікірінше, Маңғыстау облысының танымдық туризм бағыты ретіндегі халықаралық беделі артып келеді. Бұл үрдіс өңірге келетін шетелдік туристер санының біртіндеп өсуінен де байқалып отыр.
