Астана күні қарсаңында, 4-5 шілде күндері елордада республикалық Creative Aimaq жобасы аясында «Ботай – Ұлы дала мәдениеті» атты креативті жәрмеңке өтеді. Іс-шара Ұлы дала тарихын креативті экономикамен, этносәнмен және заманауи цифрлық технологиялармен ұштастыратын ерекше алаңға айналмақ, деп хабарлайды Астана әкімдігінің ресми сайтына сілтеме жасап QazMonitor.
Жәрмеңке Qazaq Creative Hub алаңында ұйымдастырылады. Жобаны «Креативті индустрияларды дамыту қоры» корпоративтік қоры жүзеге асырады. Биылғы бағдарлама Солтүстік Қазақстан облысының North Kazakhstan Heritage Weekend жобасы аясында өтеді.
Ұйымдастырушылардың мәліметінше, дәл Солтүстік Қазақстан аумағында адамзат өркениетінің маңызды кезеңдерінің бірі – жылқыны алғаш қолға үйретумен байланысты Ботай мәдениеті қалыптасқан. Бүгінде өңір тарихи-мәдени мұраны креативті индустриямен, цифрлық технологиялармен және адами капиталды дамытумен ұштастырып келеді.
Көрме үш тақырыптық аймақтан тұрады.
Бірінші аймақ тарихи-мәдени мұраға арналады. Мұнда келушілер Ботай мәдениетімен, археологиялық жаңалықтармен, қазақ халқының салт-дәстүрімен, ұлттық қолөнермен, сәндік-қолданбалы өнермен және Абылай хан тарихымен таныса алады. Сонымен қатар көркем симпозиум барысында салынған картиналар, Ботай мәдениетінің интерактивті мультимедиалық көрмесі, «Абылай хан резиденциясы» театрландырылған экспозициясы, қыш шеберханасы, дәстүрлі кілем тоқу өнерінің көрсетілімі, авторлық керамика және халық шеберлерінің бұйымдары ұсынылады.
Екінші аймақ Солтүстік Қазақстан облысының креативті экономикасына арналмақ. Онда өңірдің үздік брендтері, ұлттық нақыштағы заманауи дизайнерлік киімдер, авторлық әшекейлер, кәдесыйлар, қолөнершілердің туындылары мен сәндік-қолданбалы өнер бұйымдары қойылады. Сондай-ақ этно-сән көрсетілімі, жергілікті өндірушілердің жәрмеңкесі, жанды этно-музыка және өңір шеберлерінің шеберлік сабақтары өтеді.
Үшінші кеңістік технологиялар мен медиаға арналады. «Цифрлық киіз үй» аймағында ақпараттық технологиялар, жасанды интеллект, робототехника, GameDev, VR/AR, 3D-баспа және цифрлық шығармашылық бағытындағы жобалар таныстырылады. Келушілер өңірдің инновациялық экожүйесімен танысып, SKO Hub ұйымдастыратын интерактивті квестке қатысып, дрондар мен заманауи технологиялардың көрсетілімін тамашалай алады.
Сонымен қатар кино, анимация және медиаөндіріске арналған арнайы алаң жұмыс істейді. Онда Солтүстік Қазақстан облысының авторлары түсірген деректі, анимациялық және қысқаметражды фильмдер көрсетіледі.
Бағдарлама этно-концертпен, жанды музыкамен және өңірлік брендтер мен халық шеберлерінің өнімдері қойылған көрме-жәрмеңкемен қорытындыланады.
Жәрмеңке екі күн бойы сағат 10:00-ден 19:00-ге дейін жұмыс істейді. Келушілер интерактивті көрме алаңдарын аралап, өңірлік брендтердің өнімдерімен танысып, қолөнершілердің көрме-сатылымына қатысып, шеберлік сабақтары мен мультимедиалық экспозицияларды тамашалай алады.
