Астана қаласындағы Qazaq Creative Hub алаңында Атырау облысы әкімдігінің ұйымдастыруымен Atyrau Creative Days – Атырау облысының креативті жәрмеңкесі өтті, деп хабарлады елорда әкімдігінің ресми сайты.
Екі күндік іс-шарада өңірден келген 20-ға жуық шебер өз жұмыстарын Астана тұрғындары мен қонақтарына ұсынды.
Atyrau Creative Days бағдарламасы жәрмеңкемен шектелген жоқ. Екі күн ішінде көрме, сән көрсетілімі, театрландырылған қойылым, 3D технологияларға арналған жобалар және Creative Talks форматындағы кездесулер өткізді.
Creative Talks алаңында креативті индустрияның қазіргі бағыты, жаңа идеялар мен шығармашылық кәсіптің мүмкіндіктері талқыланды. Бұл кездесулер сала өкілдерінің тәжірибе алмасуына және жаңа байланыстар орнатуына мүмкіндік береді.
