Биыл Қазақстанның оңтүстік өңірлеріндегі Арал-Сырдарья және Шу-Талас бассейндерінде вегетациялық кезең тәуекелдермен өтуі мүмкін. Бұл туралы бүгін Үкімет отырысында Су ресурстары және ирригация министрі Нұржан Нұржігітов мәлімдеді, деп хабарлайды QazMonitor.
Оның сөзінше, Тоқтоғұл су қоймасының көлемі 7610 млн. текше метр құрайды, бұл былтырғы деңгейден 1,5 миллиард текше метрге төмен. Энергия тапшылығы жағдайында су қоймасы күшейтілген режимде босатылуда.
«Осыған байланысты вегетация басында Тоқтоғұл су қоймасы жинақтау режиміне көшіріледі деп болжануда, тиісінше бұл Түркістан облысының Мақтаарал және Жетісай аудандарының қажеттіліктері үшін мемлекетаралық «Достық» каналы арқылы су жеткізуге кері әсерін тигізуі мүмкін», деді министр.
Осыған орай ол облыс әкімдіктеріне су алу лимиттерін қатаң сақтау, оның ішінде күріш егісі бойынша белгіленген лимиттерді сақтауды ескертті. Атап айтқанда Түркістан облысында «Достық» каналы бойында күріш егуді толықтай тоқтату, Қызылқұм каналы бойында – 3,5 мың гектардан асырмау. Сондай-ақ Қызылорда облысында күріш алқабы 70 мың гектардан аспауы қажет екенін еске салды.
Қазір Шардара су қоймасы жинақтау режиміне ауыстырылған. Келісілген деңгейдегі көлем келген жағдайда су қоймасына кемінде 8,3 миллиард текше метр су келеді деп жоспарланған. Бұл Шардара су қоймасын шамамен 5 миллиард текше метрге көлемінде толтыруға, Көксарай контрретегішін 2 миллиард текше метр көлемге дейін жинақтауға және Қызылорда облысына шамамен 1,3 миллиард текше метр су жеткізуге мүмкіндік береді.
Вегетациялық кезеңде Сырдарья өзені бассейнінде жиналатын су көлемін жанама ағындарды ескере отырып, тиімді бөлу көзделіп отыр. Бұл ретте Өзбекстан аумағындағы Шарвак су қоймасы реттеуші әлеуетіне басымдық беріледі.
«Шу-Талас бассейні бойынша Киров су қоймасының толмау қауіпі бар. Аталған су қоймасы Жамбыл облысының ауызсу және суармалы сумен жабдықтаудың негізгі көзі болып табылады. Бүгінгі күні оның көлемі 314 млн. текше метр құрайды, бұл өткен жылғы деңгейден бір жарым есе төмен.1 сәуірге қарай су қоймасындағы су көлемі шамамен 400-410 млн. текше метр болады деп күтілуде. Су бөлу үлестерін ескергенде, бұл Қазақстан үшін небәрі 285 млн. текше метр су алуға мүмкіндік береді. Ал ең төменгі қажеттілік 400 млн. текше метрді құрайды», деді Нұржігітов.
Сонымен қатар министр сәуір айында Астанада Шу және Талас өзендеріндегі мемлекетаралық су шаруашылығы нысандарын пайдалану жөніндегі комиссия отырысын өткізу жоспарланғанын атап өтті. Жиын қорытындысы бойынша Қазақстан үшін су беру кестелері бекітіледі.
