12 наурыздан бастап «Цифрлық кодекс» аясында қабылданған Әкімшілік құқық бұзушылық туралы кодекстің 31-бабына енгізілген өзгерістер өз күшіне енеді, деп хабарлайды QazMonitor басылымы ІІМ-ге сілтеме жасап.
Бұл өзгерістер процестерді цифрландырумен және технологиялардың дамуымен байланысты. ІІМ жаңа ережелер ешқандай тыйымдар енгізбейтінін атап өтті – заң бұрынғы күйінде қалады, тек заң бұзушылықтарды тіркеу әдістері өзгереді.
Бұған дейін автоматты жүйелер жылдамдықты асыру, тыйым салынған сигналға өту, белгілер мен таңбаларды сақтамау, қате тоқтау немесе тұраққа қою, басып озу ережелерін бұзу, жаяу жүргіншілерге басымдық бермеу сияқты заң бұзушылықтың алты түрін тіркейтін.
Қалған барлық бұзушылықтарды тек полиция қызметкері қолмен анықтайтын. Енді тіркеудің үш әдісі қарастырылған. Атап айтқанда классикалық камералар бұрынғыдай жұмысын жалғастырады. Автоматты тіркеу камералары арнайы өлшемдерді қажет етпейтін басқа да заң бұзушылықтарды, мысалы, көлік тізгінінде телефон пайдалануды немесе қауіпсіздік белдігін тақпауды анықтай алады.
Әкімшілік құқық бұзушылықтың бірыңғай тізілімі жүйесімен біріктірілген мемлекеттік деректер базаларын пайдалану. Мемлекеттік базалармен интеграциялану арқылы құжаттарға қатысты бұзушылықтарды (техникалық байқаудың мерзімі өтуі, сақтандырудың болмауы, қару сақтау рұқсатының мерзімі аяқталуы және т.б.) автоматты түрде анықтауға мүмкіндік береді.
Сондай-ақ, жүйе заңда ескерту жасау көзделген жағдайларда автоматты түрде ескерту бере алады. Мысалы, бұл кептеліс тудыруға, сыртқы жарықтандыру құралдарын дұрыс пайдаланбауға және басқа да ұқсас ереже бұзушылықтарға қатысты.
Камералар жаяу жүргіншілердің заң бұзушылықтарын тіркемейді, олардың міндеті - көлік құралдарының тәртібін бақылау.
«Кейбір бұқаралық ақпарат құралдарында тараған "автоматты тіркеу камералары жаяу жүргіншілерді жауапқа тартады" деген ақпарат шындыққа жанаспайтынын ерекше түсіндіреміз. Бұл жүйелер тек көлік құралдарының жол қозғалысы ережелерін бұзуын анықтауға арналған», деп атап өтті полиция өкілдері.
