Қарағанды облысында мемлекеттік қолдау есебінен алғашқы шағын индустриялық аймақ пайдалануға берілді. Жоба жергілікті тауар өндірушілерге өндірісті жылдам іске қосуға мүмкіндік беретін тиімді инфрақұрылымдық шешім ретінде ұсынылып отыр. Алаңда шағын және орта бизнес субъектілеріне нарықтық бағадан төмен жалдау құнымен дайын өндірістік ғимараттар қолжетімді.
Өңір басшысы Ермағанбет Бөлекпаев жаңа индустриялық аймақты аралап көріп, кәсіпкерлермен кездесіп, жобаның іске асу барысымен танысты.
«Біздің өңірде бұл механизм «Сарыарқа» » әлеуметтік-кәсіпкерлік корпорациясы арқылы жүзеге асырылып отыр. Кәсіпкерлерге өндірістік ғимараттар салу үшін 3% мөлшерлемемен жеңілдетілген несиелер берілді. Пайдалануға берілгеннен кейін нысандар басқа бизнес өкілдеріне нарықтағы бағадан төмен құнмен жалға ұсынылады», деді Бөлекпаев.
Әкімдік мәліметінше, бұл формат жергілікті өндірісті дамытуға, жаңа жұмыс орындарын ашуға және экономикалық белсенділікті арттыруға бағытталған. Қазіргі таңда индустриялық аймақта екі кәсіпорын жұмыс істеп тұр. Оның бірі – су және газ жүйелеріне арналған полиэтилен құбырларын өндіру, екіншісі – кабель өнімдерін шығаратын кәсіпорын. Аталған өндірістердің іске қосылуы шамамен 100 жаңа жұмыс орнын құруға мүмкіндік берген.
Шағын индустриялық аймақтың жалпы аумағы 4,2 мың шаршы метрді құрайды. Жобаға қатысушы кәсіпкер Сергей Миловановтың айтуынша, ғимараттар заманауи талаптарға сай салынған, барлық инженерлік желілер – электр, су, кәріз және газбен жылыту жүйелері толық тартылған.
Жобаның модераторы ретінде «Сарыарқа» ӘКК жалдау мөлшерлемесін бекітіп, кәсіпкерлердің нақты сұраныстарын ескере отырып, алаңды бейімдеген.
«Біз Қарағанды облысындағы алғашқы кабель зауытын іске қостық. Қуаттық және бақылау кабельдерін 16 қимасына дейін өндіреміз. Алдағы уақытта өндірісті кеңейтуді жоспарлап отырмыз. Нысанның қала аумағында орналасуы логистика тұрғысынан өте қолайлы. Біз үшін ғимарат арнайы қайта жаңғыртылып, кеңейтілді», дейді кәсіпорын директоры Қайыржан Бижігіт.
Облыс әкімдігінің хабарлауынша, Қарағанды қаласында тағы бір осындай индустриялық аймақ салынып жатыр. Сонымен қатар, Саран қаласында да шағын индустриялық алаң ашу жоспарланып отыр. Алдағы кезеңде бұл тәжірибе өңірдің басқа қалаларында да енгізіледі.
Дереккөз: Қарағанды облысы әкімдігі
