2025 жылы Қазақстанның көлік саласында транзит пен логистиканы дамытуға бағытталған бірқатар ірі инфрақұрылымдық жобалар іске асырылды. Жобалар елдің халықаралық көлік бағыттарындағы рөлін күшейтуге бағытталды.
Авиация саласы
Авиациялық қауіпсіздік бойынша ИКАО стандарттарына сәйкестік деңгейі 95,7%-ға жетті. Ақтау әуежайының инфрақұрылымын жөндеу жұмыстары аяқталды. Зайсан, Катонқарағай және Кендірлі елді мекендерінде жаңа әуежайлардың құрылысы жүргізілуде. Сонымен қатар Павлодар, Балқаш және Арқалық әуежайларында қайта жаңғырту жұмыстары жалғасып жатыр.
Елімізде өткізілген авиациялық қауіпсіздіктің кешенді аудитінің нәтижесі бойынша биыл Қазақстан ТМД елдері мен ИКАО-ның Еуроазиялық өңіріндегі көшбасшы елдердің қатарына кірді. Сондай-ақ әуе тасымалы саласында қолданылатын ұшақтардың санын 45% жаңартуды жоспарлап отыр.
Теңіз логистикасы
Ақтау портында контейнерлік хабтың құрылысы аяқталды. Сондай-ақ Грузияның Поти портында «Поти ТрансТерминал» нысаны пайдалануға берілді. Бұл жобалар Қазақстанның халықаралық теңіз бағыттарындағы позициясын нығайтты.
Теміржол инфрақұрылымы
Достық – Мойынты теміржол желісі іске қосылды. Жаңа желінің ұзындығы 836 шақырымды құрайды. Қазақстан – Қытай бағытының өткізу қабілеті 5 есеге артты. Алматы айналма теміржол желісінің құрылысы аяқталуға жақын. Оның ұзындығы 75 шақырым. Мойынты – Қызылжар бағытында 323 шақырымдық жаңа желінің құрылысы басталды. Дарбаза – Мақтаарал (157 шақырым) және Аягөз – Бақты (297 шақырым) жобалары жалғасуда.
Автомобиль жолдары
Шамамен 13 мың шақырым автомобиль жолы жөнделді. Қалбатау – Майқапшағай, Ұзынағаш – Отар және Қызылорда – Жезқазған бағыттарындағы учаскелер толық аяқталды. Қызылорда – Жезқазған жолы (Ұлытау облысы) бойынша жұмыстар жалғасып жатыр. Ертіс өзені арқылы өтетін көпірдің құрылысы жүргізілуде. 2026 жылы республикалық маңызы бар тағы 10 мың шақырым жолға орташа жөндеу жүргізу жоспарланған.
Теміржол вокзалдары
Ел бойынша 124 теміржол вокзалында жаңғырту жұмыстары қолға алынды. Оның ішінде 46 нысанда құрылыс-монтаж жұмыстары 2025 жылы аяқталады.
