2026 жылғы 1 қаңтардан бастап Қазақстанда отандық тауар өндірушілердің цифрлық Реестрі (ОТӨ тізілімі) іске қосылады. Жаңа платформа отандық бизнестің реттелетін сатып алуларға қатысуы мен мемлекеттік қолдаудың нысаналы шараларын алу үшін негізгі құралға айналады.
«Өнеркәсіптік саясат туралы» заңға енгізілген өзгерістерге сәйкес, енді басымдықпен сатып алуларға қатысу және мемлекеттік қолдауға ие болу мүмкіндігі тек ОТӨ тізіліміне енгізілген компанияларға ғана беріледі. Осылайша, мемлекет қолдауы нақты өндірістік қызметі бар кәсіпорындарға бағытталмақ.
Үкімет ақпаратына сәйкес, реестрге кірудің басты талабы – Қазақстан аумағында нақты өндірістің бар екенін растау болады. Тіркеу үшін кәсіпорын e-ondiris.gov.kz платформасында электрондық цифрлық қолтаңба арқылы өтінім береді, кейін өндірістік тексеру мен бағалау рәсімдерінен өтеді. Барлық процесс онлайн форматта жүзеге асады.
Жүйенің ерекшелігі – мемлекеттік дерекқорлармен интеграцияланған, компания туралы мәліметтердің бір бөлігі автоматты түрде жүктеледі, ал жетіспейтін құжаттарды өтініш беруші өзі толықтырады. Бұдан бөлек, платформа «цифрлық іздер» қағидаты бойынша верификация жүргізеді: өндірістік алаңдар, жабдықтар, рұқсат құжаттары, жеткізу тізбегі, электрондық шот-фактуралар мен кедендік статистика деректері кешенді түрде талданады.
Әрбір сыртқы экономикалық қызмет тауар номенклатурасы коды бойынша (жалпы саны – 3 371 тауар тобы) технологиялық операциялар мен өндірісті оқшаулаудың ең төменгі деңгейіне қойылатын талаптар белгіленген. Бұл талаптар отандық өнімнің нақты үлесін айқындауға бағытталған.
Реестрге енгізілген компаниялар үшін мәртебені сақтау мақсатында тұрақты мониторинг тетігі қарастырылған. Ол өндірістің сақталуын және белгіленген талаптарға сәйкестігін бақылауға мүмкіндік береді.
Еске салсақ, бұған дейін 1 800 сертификат иесі Отандық өндірушілер тізіліміне көшірілгені хабарланды. Цифрлық платформа бюрократияны қысқартып, мемлекеттік қолдауды нақты өндірушілерге бағыттауды көздейді.
Дереккөз: Үкімет
