UI GreenMetric World University Rankings 2025 нәтижесі бойынша Қазақстан Орталық Азия өңіріндегі экологиялық күн тәртібінің абсолютті лидеріне айналды. Отандық жоғары оқу орындарының жаһандық рейтингтегі үлесі соңғы бес жылда үш есе өскен.
Мемлекет басшысының «Таза Қазақстан» жалпыұлттық бастамасы аясында еліміздің жоғары білім беру жүйесінде түбегейлі трансформация байқалуда. Егер 2020 жылы UI GreenMetric беделді халықаралық рейтингіне елімізден небәрі 11 университет енсе, 2025 жылы бұл көрсеткіш 30-ға жетті. Бұл — қазақстандық ЖОО-лардың ESG (экологиялық, әлеуметтік және корпоративтік басқару) принциптерін стратегиялық даму деңгейіне шығарғанының айқын дәлелі.
Биылғы рейтингке әлемнің 105 елінен 1 745 университет қатысқан. Бәсекелестіктің жоғары болғанына қарамастан, Қазақстан Орталық Азиядағы жетекші позициясын нығайтты. Өңір бойынша үздік үштіктің екеуін отандық оқу орындары иеленіп отыр.
Рейтинг қорытындысы бойынша Д. Серікбаев атындағы Шығыс Қазақстан техникалық университеті (ШҚТУ) сенсациялық нәтиже көрсетті. Университет әлемдік тізімде 139-орынға тұрақтап, Орталық Азиядағы ең «жасыл» жоғары оқу орны мәртебесін бекітті.
Университеттің жетістігін сипаттайтын негізгі көрсеткіштер:Білім және зерттеулер: Бұл санатта ШҚТУ әлем бойынша 10-орынды иеленіп, барлық индикаторларды 100% орындады. Мүмкін болған 10 000 баллдың 8 412,5-ін иеленді. Энергия тиімділігі мен кампустың экологиялық тұрақтылығы бойынша жоғары баға алды.
Сондай-ақ, ұлттық сегментте үздік нәтиже көрсеткендер қатарында М. Әуезов атындағы Оңтүстік Қазақстан зерттеу университеті (258-орын), Ш. Есенов атындағы Каспий технологиялар және инжиниринг университеті (333-орын) және Абай атындағы Қазақ ұлттық педагогикалық университеті (356-орын) бар.
ҚР Ғылым және жоғары білім министрлігінің пікірінше, мұндай ілгерілеушілікке жүйелі мемлекеттің гранттық қолдауы тікелей әсер етті. Қаржыландырылып жатқан ғылыми жобалардың басым бөлігі «жасыл» экономика, цифрлық шешімдер және экологиялық қауіпсіздік мәселелеріне бағытталған.
Университеттер енді тек білім беру орталығы ғана емес, сонымен қатар «жасыл кампус» тұжырымдамасын жүзеге асырушы инновациялық хабтарға айналып жатыр. Бұл тенденция ұлттық білім беру жүйесінің халықаралық инвестициялық тартымдылығын арттырып, Қазақстанның жаһандық климаттық міндеттемелерін орындауға септігін тигізеді.
