Жамбыл облысындағы Фурманов айналма каналында соңғы 40 жылда алғаш рет механикалық тазалау жұмыстары толық аяқталды. Бұл жоба Шу өзені арқылы Түркістан облысының Созақ ауданына экологиялық мақсатта су жіберу тиімділігін арттыруға мүмкіндік береді.
Су ресурстары және ирригация министрі Нұржан Нұржігітов өңірге жұмыс сапары барысында бірқатар стратегиялық нысандарды аралап, жүзеге асырылып жатқан жобалардың барысын тексерді. Шу ауданында ол ирригация және дренаж жүйелерін жаңғыртудың екінші кезеңі бойынша атқарылған жұмыстармен танысты.
Биыл жалпы ұзындығы 69,7 шақырым болатын 15 канал реконструкцияланып, олардың бойына 240 гидротехникалық құрылыс орнатылды. Бұған қоса, 55 бақылау ұңғымасы бұрғыланды. Қазіргі уақытта нысандарды пайдалануға беру рәсімдері жүргізілуде.
Сондай-ақ министр Мойынқұм ауданында Фурманов гидроторабындағы жөндеу жұмыстарының нәтижелерін тексерді. Шу өзенінде орналасқан бұл нысан Созақ ауданына экологиялық су жіберу жүйесінде маңызды рөл атқарады. Былтыр мұнда сегментті қақпа толық ауыстырылған.
Бұған қоса Қарабөгет ауылында Шу өзені арқылы өтетін ұзындығы 78,3 метр болатын автокөлік көпірінің құрылыс барысын көрді. Жоба іске қосылған соң, елді мекеннің көлік қатынасы жақсарып, өңірлік логистика қауіпсіз әрі жедел болмақ.
Айта кетейік, Фурманов айналма каналына жүргізілген механикалық тазалау жұмыстары шілде айында басталып, 25 желтоқсанда аяқталды. Ұзындығы 120 шақырым, ені 30–40 метрді құрайтын канал тазалауға 9 шынжыртабанды экскаватор мен 2 тиегіш техника тартылған. Бұл шара канал бойындағы Қылышбай, Құмөзек, Қарабөгет және Сарыөзек елді мекендері үшін су өткізу қабілетін айтарлықтай арттырды.
Нәтижесінде Шу өзені арқылы Созақ ауданына су жіберу үдерісі анағұрлым тиімді болады. Еске салсақ, өткен вегетацияаралық кезеңде экологиялық мақсатта бұл ауданға 1,5 млрд текше метр су бағытталған.
Қазіргі күніМойынқұм ауданында Шу өзенінде реттеуші гидротехникалық құрылыс салу және өзен арнасын тазалау жобасы әзірленіп жатыр.
