Қазақстан Президенті Қасым-Жомарт Тоқаев даңқты қолбасшы, Ұлы Отан соғысының батыры Бауыржан Момышұлына «Халық қаһарманы» атағын беру туралы шешім қабылдағанын мәлімдеді.
Президенттің сөзінше, Бауыржан Момышұлының ерлігі мен тұлғасы халқымыз үшін әлдеқашан қаһармандықтың символына айналғанымен, осы уақытқа дейін оған ең жоғары мемлекеттік атақ ресми түрде берілмеген.
«Халқымыз оны қаһарман тұлға ретінде құрмет тұтады. Бірақ әйгілі батырға ресми түрде «Халық қаһарманы» атағы берілмеген. Облыс жұртшылығы, зиялы қауым өкілдері, тіпті, жастарымыз да осы мәселені көтеріп жүргенін білеміз. Тарихи әділдікті қалпына келтіруіміз керек. Сондықтан мен Мемлекет басшысы ретінде Бауыржан Момышұлына «Халық қаһарманы» атағын беру туралы шешім қабылдадым. Тиісті Жарлыққа бүгін қол қойдым, бұл құжат міндетті түрде жарияланады», – деді Қ.Тоқаев.
Мемлекет басшысы Бауыржан Момышұлының ерлігі аңызға ғана емес, нақты тарихи деректер мен майдандас батырлардың куәлігіне сүйенетінін атап өтті. Президенттің айтуынша, ел үшін еңбек сіңірген, ерлігімен танылған азаматтарды лайықты бағалау – ұлттың рухани беріктігін көрсетеді.
Сондай-ақ Қасым-Жомарт Тоқаев Тараз қаласына жасаған сапары барысында жаңадан ашылған әскери мектеп-интернатқа Бауыржан Момышұлының есімін беру жөнінде ұсыныс айтты. Бұл – оңтүстік өңірлерде ашылған алғашқы осындай білім ордасы.
«Мен бүгін Таразда жаңадан ашылған әскери мектеп-интернатқа бардым. Бұл – оңтүстік аймақтарда ашылған осындай алғашқы оқу орны. Мен мектеп-интернатқа осы өлкенің тумасы, әйгілі батырымыз Бауыржан Момышұлының есімін беруді ұсынамын. Осындай Бауыржан мектептері барлық аймақта ашылуы керек. Үкімет бұл мәселені пысықтайды. Біз жас ұрпаққа сапалы білім беріп, оларды отаншылдыққа тәрбиелеуіміз қажет», деді Президент.
Мемлекет басшысының айтуынша, батырдың есімі жас ұрпақ үшін отансүйгіштік пен ерліктің айқын үлгісі болып қала береді, ал қабылданған шешім – тарихи әділдіктің нақты көрінісі.
Еске салсақ, биыл Бауыржан Момышұлының туғанына 115 жыл толды, ол 1910 жылдың 24 желтоқсанында Жамбыл облысында дүниеге келген.
