Астанада өткен ALEM TECH FEST 2026 фестивалі елорданы үш күнге Орталық Азияның технологиялық орталығына айналдырды, деп хабарлайды QazMonitor Alem TechFest 2026 баспасөз қызметіне сілтеме жасап. Шараға жеті елден, соның ішінде Гонконг, Вьетнам және Эстониядан келген 5 мыңнан астам жас инженер қатысты.
Биылғы фестивальдің басты ерекшелігі – Physical AI, яғни физикалық жасанды интеллект бағыты. Бұл жүйелер чат-боттар сияқты тек цифрлық ортада емес, сенсорлар мен лидарлар арқылы шынайы кеңістікті қабылдап, физикалық кедергілер жағдайында шешім қабылдай алады. Сарапшылар мұны отандық робототехниканың жаңа кезеңі деп бағалап отыр.
Physical AI Championship алаңында командалар Unitree G1 Edu гуманоидтарымен жұмыс істеуде. Бір роботтың құны 20-30 млн теңге аралығында. Қатысушылар роботқа объектіні автономды түрде тауып, алып, адамға беру алгоритмін жазуы керек. Қазақстан бойынша 15 команда өтініш беріп, іріктеуден тек 4 команда өтті. Олар 5 000 долларлық жүлде үшін бақ сынауда.
Сонымен қатар RoboCup Rescue жарысында төрт аяқты робот-иттер техногендік апатты имитациялайтын кедергілерден өтеді. Роботтар QR-кодты оқып, маршрут құрып, тар өткелдер мен еңістерді еңсереді. Кей кезеңдерде командаларға стандартты басқарумен шектелмей, өз тұрақтандыру алгоритмдерін әзірлеуге тура келеді.
Ұйымдастырушылардың айтуынша, фестиваль күрделі робототехникаға қызығушылықтың артқанын көрсетеді. Қатысушылар географиясының кеңдігі мен мемлекеттік қолдау Physical AI бағытының Қазақстан үшін стратегиялық маңызға ие бола бастағанын аңғартады.
