Биылғы жылдың екінші жартысында бұл лицензиялар қайта бөлініп, тағы 100 мың педагогке ұсынылады. Нәтижесінде 2026 жылы 200 мың педагог жасанды интеллект құралдарын тәжірибе жүзінде қолдану дағдыларын меңгереді, деп хабарлайды QazMonitor.
Бүгінгі таңда бөлінген лицензиялардың 5 мыңы балабақшаларға, 85 мың лицензия орта білім беру ұйымдарына, 10 мың лицензия колледждерге беріледі.
Жоба аясында әрбір қазақстандық ұстаздың жеке «цифрлық көмекшісі» пайда болады. ChatGPT Edu технологиясы сабаққа дайындық уақытын айтарлықтай үнемдемек: енді сабақ жоспарын түзу, тесттер мен тапсырмалар дайындау небары бірнеше минутты ғана алады.
Жасанды интеллект оқу материалдарын қазақ, орыс және ағылшын тілдерінде әзірлеп қана қоймай, оны әр оқушының қабілетіне қарай жеке бейімдеп бере алады. Бұл құрал күрделі тақырыптарды қарапайым тілмен түсіндіруге, сабақты қызықты пікірталас немесе зерттеу жобасына айналдыруға таптырмас көмекші болмақ.
Сонымен қатар ChatGPT Edu бағалау критерийлерін әзірлеуге, оқушылардың жұмыстарын алдын ала талдауға және әрбір білім алушыға жеке кері байланыс дайындауға қолдау көрсетеді. Тек қорытынды бағаны әрқашан педагогтың өзі қояды.
