Ұлттық құрылтайдың V отырысында Мемлекет басшысы Қасым-Жомарт Тоқаев цифрландыру және жасанды интеллект жылын сән қуып, ұрандату үшін жарияламағанын атап өтті, деп хабарлайды QazMonitor. Бұл шешімнің негізгі мақсаты – мемлекеттік аппараттың жұмысын тиімді ету және нақты нәтижелерге қол жеткізу екенін жеткізді.
Президент білім, ғылым және жоғары технология саласына қомақты инвестиция салынатынын айтып, адам капиталының сапасын арттыру – басты міндет екенін ерекше атап өтті. Бұл әсіресе ел дамуының тарихи, бетбұрысты кезеңінде халқымыздың болашағына тікелей әсер ететінін айтты.
Тоқаев жоспарлардың тек форумдар мен тұсаукесерлер деңгейінде қалып қоймауы тиіс екенін, пиар-акциялар мен жалған ілгерілеуге емес, нақты жетістікке ұмтылу қажет екенін айтты. Цифрландыру мен жасанды интеллект жылдары мемлекеттік аппаратқа нақты міндет жүктейтін стратегиялық шара екені айтылды.
Сонымен қатар, бұл бағыттағы жұмыстың нәтижесі нақты әрі көзге көрінетін көрсеткіштермен өлшенуі керек. Президенттің сөзіне қарағанда, бұл, әсіресе, шешім қабылдау мерзімін қысқарту, еңбек өнімділігін арттыру және қызмет сапасын жақсарту сияқты бағыттарды қамтуы тиіс.
