Алматы халықаралық әуежайының қаржылық қызметін nексеру нәтижесінде акционер болып саналмайтын заңды тұлғаға 6,8 млрд теңге сомасына дивидендтердің заңсыз төленгені белгілі болды, деп хабарлайды QazMonitor.
Бұл жағдай стратегиялық нысанның активтері мен даму мүмкіндіктеріне әсер етіп, қаржылық тұрақтылығын төмендеткен. Қаржы министрлігінің мәліметінше, тексеру қорытындысы бойынша тиісті қаражат әуежайдың шотына толығымен қайтарылды. Қайтарылған қаржы Алматы әуежайын дамытуға, жолаушыларға қызмет көрсету сапасын және басқа да сервистерді жақсартуға бағытталмақ.
Ішкі мемлекеттік аудит комитетінің төрағасы Ержан Мыңжасаровтың айтуынша, 2025 жылы енгізілген тың тәсілдердің арқасында бақылау органы жаппай тексерудің орнына атаулы, нақты бағытталған жұмысқа басымдық берген. Комитет сын-қатері жоғары аймақтарға назар аударып, осы тәсілдің тиімділікті арттырғанын атап өтті. Нәтижесінде тексерулер саны 22% қысқарса, анықталған бұзушылықтар сомасы 36% ұлғайған. Әр тексерудің үштен бірінің тиімділігі артқан.
2025 жылдың қорытындысы бойынша бюджетке 400 млрд теңге қайтарылып, сонымен бірге 1,2 млрд теңге көлемінде айыппұл өндірілді.
