2025 жылы Қазақстанда 15 мыңнан астам азамат бұрын бөлінген жалға берілетін тұрғын үйді «сатып алу құқығынсыз» жекешелендіру мүмкіндігін пайдаланды. Оның шамамен 9 мыңы тұрғын үйді өтеусіз негізде иеленген. Бұл туралы ҚР Өнеркәсіп және құрылыс министрлігінің Құрылыс, тұрғын үй және коммуналдық шаруашылық істері комитетінің төрағасы Бақытжан Жүнісбеков мәлімдеді, деп хабарлайды QazMonitor.
Оның айтуынша, тұрғын үйді жалдау ақысының бір бөлігін субсидиялау және тұрғын үй сертификаттарын беру бағдарламалары жүзеге асырылып жатыр.
2025 жылы 11 мыңнан астам азамат жалдау ақысына арналған субсидияларды пайдаланды. Бұл мақсаттарға республикалық бюджеттен 7,6 млрд теңге бөлінген. Ал 2026 жылы тағы 11 мың азаматты жалдау ақысын субсидиялау жоспарланып отыр.
Сонымен қатар 2025 жылы 1 733 азамат тұрғын үй сатып алу кезінде алғашқы жарнаны жабу үшін жалпы сомасы 2 млрд теңгеге тұрғын үй сертификаттарын алған. Биыл жергілікті бюджет есебінен 3,5 мың сертификат беруге 4,3 млрд теңге қарастырылған.
