Министрліктің мәліметінше, 2026-2028 жылдары еліміздің 17 өңірінде ересектер мен балаларға арналған 49 жаңа бейінді бөлімше ашу жоспарланған, деп хабарлайды QazMonitor. Ревматология, пульмонология, гастроэнтерология және гематология бағыттары бойынша 800-ге жуық жаңа төсек іске қосылады. Бұл ерте диагностика жүргізуге, емдеуді уақтылы бастауға және созылмалы әрі ауыр дертке шалдыққан науқастардағы асқыну қаупін азайтуға мүмкіндік береді.
2026 жылы 500 төсектік 30-ға жуық бөлімше ашылады деп жоспарланып отыр. Басымдық медициналық көмекке сұранысы жоғары өңірлерге — Ұлытау, Алматы, Қызылорда, Қостанай және Жетісу облыстарына берілген.
Қазірдің өзінде бірқатар өңірде жаңа бөлімшелер пайдалануға берілді. Атап айтқанда, Ақтөбе облысында ревматология, Павлодар облысында пульмонология мен гастроэнтерология, Ұлытау облысында пульмонология, Жамбыл облысында гематология бөлімшелері ашылды. Қаңтар айының өзінде бұл бөлімшелерде 200 пациент медициналық көмек алған.
Алдағы айда тағы бес өңірде 200-ге жуық қосымша төсек ашу көзделіп отыр. Бейінді бөлімшелер желісін кеңейту жұмыстары 2027 жылы да жалғасады. Бұл кезеңде ересектерге арналған эндокринология, пульмонология, гастроэнтерология және нефрология бағыттары бойынша тағы жеті бөлімше ашу жоспарланған.
Бағдарламаның маңызды бағыты – балалар денсаулығын қорғау. Осы аяда 224 төсектік 12 балалар бейінді бөлімшесін ашу жоспарланып, оның 102 төсегі пайдалануға берілді. Негізгі бағыттар қатарында пульмонология, аллергология, ЛОР-көмек және паллиативтік көмек бар.
