Былтыр Алматыда электросамокаттардың қатысуымен 380-нен астам жол оқиғасы орын алып, салдарынан 400-ден астам адам зардап шеккен. Ережені бұзғаны үшін самокат айдаушыларға қатысты 24 мыңнан астам хаттама толтырылды. 10 мыңнан астам самокат арнайы тұрақтарға жеткізілді, деп хабарлайды QazMonitor басылымы ҚР ІІМ баспасөз қызметіне сілтеме жасап.
Кикшеринг операторларына электросамокаттарды тек міндетті сақтандыруы болған жағдайда ғана беру, аппараттарды нөмірлік белгілермен жабдықтау және ІІМ дерекқорларымен интеграция жасау қажеттігі ескертілді.
«Мопедтерді реттеу тәжірибесі көрсеткендей, жүйелі және бір қарағанда қатаң көрінетін шаралар нәтиже береді - апаттылық азайып, тәртіп артады. Дәл осындай тәсіл электросамокаттарға қатысты да қолданылатын болады. Бұл азаматтардың өмірі мен денсаулығын қорғау мәселесі», деп атап өтті Алматы қаласы полиция департаментінің бастығы Айдын Қабдулдинов кикшеринг операторларымен кездесу барысында.
Жаңа нормалар 2026 жылдың 1 шілдесінен бастап күшіне енеді және жалға берілетін электросамокаттарды пайдалануға қойылатын бірыңғай әрі міндетті талаптарды қарастырады. Сонымен қатар, бизнес үшін өтпелі кезең қарастырылған.
