Қазақстанда денсаулық сақтау саласына жасанды интеллект негізіндегі технологиялар кезең-кезеңімен енгізіліп жатыр, деп хабарлайды QazMonitor.
Маңызды бағыттардың бірі – инсультті диагностикалау кезінде жасанды интеллектті пайдалану. Cerebra автоматтандырылған диагностика жүйесі қазіргі уақытта еліміздің 9 инсульт орталығында енгізілген.
Аталған технология инсульт белгілерін ерте кезеңде анықтауға мүмкіндік береді. Соның арқасында дәрігерлер клиникалық шешімдерді жылдам қабылдап, емдеуді дер кезінде бастай алады. Жүйені енгізу нәтижесінде тромболитикалық терапияны қолдану көрсеткіші 40 пайызға артқан. 2026 жылы бұл шешімді 33 инсульт орталығына дейін кеңейту жоспарланып отыр.
Онкологиялық қызметте де жасанды интеллект белсенді қолданылып келеді. WDSoft компаниясы әзірлеген технологиялар радиологиялық кескіндерді талдау арқылы сүт безі мен өкпе обырын ерте кезеңде анықтауға мүмкіндік береді.
Жасанды интеллектті пайдалану нәтижесінде онкологиялық ауруларды анықтау көрсеткіші 32 пайызға артты. Сонымен қатар диагностика жасау уақыты 40 минуттан 10 минутқа дейін қысқарған. Қазіргі уақытта жоба еліміздің 12 өңіріндегі 190 медициналық ұйымда жүзеге асырылып жатыр және оны кеңейту жұмыстары жалғасуда.
Заманауи технологиялар стоматология саласында да қолданылуда. Aidentis жүйесі рентген суреттерін автоматты түрде талдап, патологиялық өзгерістерді анықтап, емдеу бойынша ұсынымдар береді. Соның нәтижесінде кескіндерді талдау уақыты бір сағаттан бір минутқа дейін қысқарған.
Денсаулық сақтау министрлігінің мәліметінше, барлық цифрлық шешімдер Медициналық деректердің бірыңғай қоймасы негізінде іске асырылады. Бұл медициналық ақпараттық жүйелердің интеграциясын қамтамасыз етіп, саланы басқару тиімділігін арттыруға және Қазақстанда зияткерлік медицинаны дамытуға мүмкіндік береді.
