Қаржылық мониторинг агенттігінің Астана қаласы бойынша департаменті Sirius Energy қаржы пирамидасының құрылымдық бөлімшесін басқару фактісі бойынша тергеу жүргізіп жатыр, деп хабарлайды QazMonitor.
Тергеу мәліметінше, күдікті өзін чилилік компанияның өкілі ретінде таныстырып, азаматтарды жаңартылатын энергия көздері саласындағы жоғары табыс әкелетін жобаларға инвестиция салуға шақырған. Инвестициялар тек USDT криптовалютасы арқылы қабылданған. Салымшыларға жеке кабинеттер ашылып, онда шартты бонустар көрсетілген.
Қатысушыларды тарту үшін ұйымдастырушы Алматы және Астана қалаларында кеңселер ашып, тұрақты түрде тренингтер өткізген. Сонымен қатар Instagram мен TikTok әлеуметтік желілерінде белсенді жарнама жүргізілген. Заңды қызмет атқарып жатқандай әсер қалыптастыру үшін үшінші тұлғаның атына ЖШС тіркелген, алайда іс жүзінде ешқандай қызмет көрсетілмеген.
Нәтижесінде 380 азамат қаржы пирамидасының құрбанына айналған. Жәбірленушілердің бірі жоғары табыс туралы уәдеге сеніп, жобаға инвестиция салу үшін 3 млн теңге көлемінде несие рәсімдеген. Алайда оған ешқандай төлем жасалмаған, енді ол несиені пайызымен бірге өз қаражаты есебінен өтеуге мәжбүр.
Сот санкциясымен күдіктінің банк шоттарына тыйым салынды.
