2026 жылы автожолдардың 11 мың шақырымнан астамы құрылыс, реконструкция және жөндеу жұмыстарымен қамтылады, деп хабарлайды QazMonitor. Оның ішінде шамамен 3,4 мың шақырым жаңа құрылыс пен реконструкция жобаларына тиесілі. Ірі инфрақұрылымдық бастамалар өңірлердің көліктік байланысын нығайтып, елдің транзиттік әлеуетін арттыруға бағытталған.
Ең ірі жобалардың бірі – «Орталық – Батыс» автожолы. Мемлекет басшысының бастамасымен қолға алынған бұл жобаның жалпы ұзындығы 896 шақырымды құрайды. Жоба аясында 19 көлік қиылысы, 17 жол өткелі, 40 көпір, 654 су өткізгіш құбыр, 48 мал өткелі және 2 жаяу жүргіншілерге арналған жерасты өткелі салу жоспарланған. Бұл жол астананы батыс өңірлермен тікелей байланыстырып, Транскаспий маршрутына шығуды қамтамасыз етеді.
«Бейнеу – Сексеуіл» автожолы 559 шақырымды қамтиды. Жаңа бағыт Ақтөбе арқылы өтетін қолданыстағы маршрутпен салыстырғанда қашықтықты 900 шақырымнан астамға қысқартып, өңірлер арасындағы тікелей қатынасты қамтамасыз етеді.
Жезқазған – Қарағанды автожолының ұзындығы 572,6 шақырымды құрайды. Жоба аясында 52 көпір, 72 жол өткелі, 28 көлік қиылысы және 8 демалыс алаңы салынады.
Ірі жобалар қатарында төрт жолақты Ақтөбе – Ұлғайсын жолы да бар (шамамен 233 шақырым). Мұнда 17 көпір, 16 жол өткелі, 14 көлік қиылысы, 374 су өткізгіш құбыр, ауыл шаруашылығы техникасына арналған 13 өткел салу және зияткерлік көлік жүйесін енгізу қарастырылған. Сондай-ақ 234 шақырым талшықты-оптикалық байланыс желісі тартылады.
Атырау – Доссор автожолын реконструкциялау (87 шақырым) аясында 4 көпір, 1 екі деңгейлі көлік қиылысы, 3 жол өткелі, 18 ауыл шаруашылығы өткелі, 6 демалыс алаңы, 136 су өткізгіш құбыр және 30 мал өткелі салу жоспарланған.
Сонымен қатар елді мекендерді айналып өтетін жолдар да салынуда. Сарыағаш қаласын айналып өтетін жолдың ұзындығы 102,6 шақырымды құрап, 22 көпір, 8 көлік қиылысы, 2 теміржол өткелі, 223 су өткізгіш құбыр, 26 автобус аялдамасы және 4 жаяу жүргіншілер өткелін қамтиды. Қызылорда қаласын айналып өтетін жолдың ұзындығы шамамен 26 шақырым, онда 4 көпір, 2 көлік қиылысы, 4 жол өткелі және жерасты өткелі қарастырылған.
Аталған жобаларды жүзеге асыру өңірлер арасындағы қашықтықты қысқартуға, қалалық жолдарға түсетін жүктемені азайтуға және жол қозғалысы қауіпсіздігін арттыруға мүмкіндік береді.
