Алматы хайуанаттар бағында көптен күткен қуанышты жаңалық тіркелді — Арчи мен Белла есімді шайқағыш жанаттар үш күшік әкелді. Бұл соңғы жиырма жылға жуық уақыт ішінде хайуанаттар бағында дүниеге келген алғашқы шайқағыш жанат төлдері. – деп хабарлайды QazMonitor Алматы хайуанаттар бағының баспасөз қызметіне сілтеме жасап,
Күшіктер 27 сәуірде туған. Алғашқы кезеңде олар анасымен бірге ұяда болып, сыртқа шықпаған. Белла төлдеріне ерекше қамқорлық көрсетіп, оларды ұзақ уақыт бойы қоршаған ортадан қорғап келген.
Қазір күшіктер өсіп, өздігінен қозғала бастағандықтан, кең қоршауға шығарылып, айналаны белсенді зерттеп жүр.
Әзірге олардың жынысы анықталмаған, сондықтан есімдері де кейінірек қойылады.
«Шайқағыш жанаттардың жаңа туған күшіктері небәрі 60–70 грамм салмақта болады. Олар соқыр әрі саңырау күйде дүниеге келеді және алғашқы апталарда толықтай анасына тәуелді. Бұл кезеңде тек ана сүтімен қоректенеді. Қазір күшіктер біртіндеп ересек жануарлардың рационына бейімделіп келеді. Олардың қорегінде ет, балық, көкөніс, жеміс-жидек және сүйікті сұлы ботқасы бар», – деді «Жыртқыш сүтқоректілер» бөлімінің жетекшісі Гаухар Сергибаева.
Шайқағыш жанаттар отбасы хайуанаттар бағы аумағындағы керіктер экспозициясына қарама-қарсы орналасқан «Леопард» аймағындағы ең шеткі қоршауда мекендейді.
Алматы хайуанаттар бағы келушілерді жаңа туған күшіктерді тамашалауға шақырып, жануарлардың тыныштығын сақтау олардың дұрыс дамуы үшін маңызды екенін еске салды. Мамандар күшіктердің аман-есен өсіп-жетілуіне сенім білдіріп отыр.
