Президент Қасым-Жомарт Тоқаевтың тапсырмасы бойынша Алматы – Қаскелең автожолын кеңейту жобасы іске асырылады. Бұл туралы премьер-министр Олжас Бектеновтің қатысуымен өткен кеңесте мәлім болды, деп хабарлайды QazMonitor.
Жоба аясында Алматыдан Қаскелеңге дейінгі ұзындығы 8 шақырым жол сегіз жолаққа дейін кеңейтіледі. Сонымен қатар екі жолайрық пен тоғыз жерүсті жаяу жүргіншілер өткелі салынады. Нәтижесінде аталған учаскенің өткізу қабілеті екі есеге артады. Жобаны Қазақстанның Даму банкі қаржыландырады, ал құрылыс жұмыстарын 2027 жылдың желтоқсанына дейін аяқтау жоспарланған.
Олжас Бектенов мердігерге осы аптаның соңына дейін техника мен жұмыс күшін жұмылдырып, 20 шілдеде құрылысты бастауды тапсырды. Сондай-ақ жер телімдерін сатып алу кезінде алыпсатарлыққа жол бермеу үшін олардың құнын 14 шілдедегі жағдай бойынша бекітуді міндеттеді.
Алматы әкімі Дархан Сатыбалдының айтуынша, қалаға тәулігіне 300 мыңға жуық автокөлік кіреді, ал жалпы көлік ағыны 1 миллионнан асады. Алматы – Қаскелең жолымен тәулігіне шамамен 60 мың көлік қатынайды.
Кеңесте сондай-ақ Ұзынағаштан басталатын ұзындығы 32 шақырым баламалы жол құрылысы, Абай даңғылын БАКАД-қа дейін ұзарту, Алматы – Есік және Алматы – Талғар бағыттарындағы жол жобалары, сондай-ақ рельсті көлік пен метроны дамыту мәселелері қаралды.
