Алматыдағы самокат, скейтборд және BMX тебуге арналған FLOW PARK қоғамдық кеңістігінде тәулік бойы жұмыс істейтін модульдік алғашқы медициналық көмек көрсету пункті пайдалануға берілді, деп хабарлайды QazMonitor
Жоба Алматы қаласының жедел медициналық көмек жүйесін жетілдіруге және тұрғындар мен қала қонақтарының қауіпсіздігін арттыруға бағытталған.
Алматы қаласының Цифрландыру басқармасының мәліметінше, бұл – қаладағы алғашқы телемедициналық алғашқы көмек көрсету модулі. Ол жедел медициналық жәрдем станциясымен тікелей байланыс жүйесімен жабдықталған.
Өзін жайсыз сезінген немесе жарақат алған адам SOS батырмасын басу арқылы жедел жәрдем диспетчерімен бірден байланыса алады. Медицина қызметкері модульді қашықтан ашып, аудио және бейнебайланыс арқылы адамның жағдайын бағалайды. Сондай-ақ жедел жәрдем бригадасы жеткенге дейін қажетті нұсқаулар береді.
Өлшемі 2×2,5 метр болатын медициналық модульде дефибриллятор, жарақаттарды алғашқы өңдеуге арналған құралдар, жедел коронарлық синдром кезінде қолданылатын медициналық жиынтық, брезент көрпе және тот баспайтын болаттан жасалған медициналық кушетка орнатылған.
Сонымен қатар модуль үздіксіз интернетпен, 360 градус шолу мүмкіндігі бар сыртқы бейнебақылау камерасымен, ішкі камералармен, ақпараттық дисплеймен және қашықтан басқарылатын телемедициналық кешенмен жабдықталған. Диспетчер нақты уақыт режимінде алғашқы көмек көрсету құралдарын пайдалану тәртібін түсіндіріп, қажетті кеңес бере алады.
Модульдің конструкциясы әртүрлі ауа райы жағдайына төзімді HPL-панельдер мен тот баспайтын болаттан жасалған.
