Қазақстанда жаңартылатын энергия көздерін (ЖЭК) дамыту бойынша жүйелі жұмыстар жалғасып жатыр. Биыл елімізде жалпы қуаты 245 МВт болатын ЖЭК-тің 10 нысанын пайдалануға беру жоспарланған. Қазірдің өзінде жалпы қуаты 212 МВт болатын 7 нысан іске қосылды, деп хабарлайды QazMonitor.
Пайдалануға берілген нысандардың қатарында Қостанай облысындағы қуаты 50 МВт «Aspan Energo» ЖШС жел электр станциясы, Маңғыстау облысындағы қуаты 20 МВт «Stellar Energy» ЖШС күн электр станциясы және Қостанай облысындағы қуаты 22,6 МВт «Altyn Solar Energy» ЖШС күн электр станциясы бар.
Сонымен қатар Жетісу облысында қуаты 20 МВт «Jetisu Terra Power» ЖШС күн электр станциясы пайдалануға берілді. Қарағанды облысында «Гиперборея» ЖШС-нің жалпы қуаты 100 МВт болатын үш жел электр станциясы іске қосылды.
Ағымдағы жылдың соңына дейін Қызылорда облысында қуаты 30 МВт «Альхена» ЖШС-нің күн электр станциясы жобасын, сондай-ақ Түркістан облысында қуаты 3,2 МВт «Тауэнерго» ЖШС-нің шағын гидроэлектр станциясын салуды аяқтап, пайдалануға беру жоспарланып отыр.
ЖЭК жобаларын іске асыру Қазақстанның энергетикалық қауіпсіздігін нығайтуға, инвестиция тартуға және жаңа жұмыс орындарын құруға мүмкіндік береді. Сонымен қатар бұл жобалар елдің энергия теңгеріміндегі экологиялық таза генерация үлесін арттыруға ықпал етеді.
