Қазақстанда балаларға арналған ұйымдарды тексерудің жаңа жүйесі енгізіледі. 2026 жылдың 1 ақпанынан бастап уәкілетті органдар мемлекеттік бюджеттен қаржыландырылатын, балаларды тамақпен, жатын орнымен қамтамасыз ететін, білім беру, тәрбиелеу және сауықтыру қызметтерін көрсететін ұйымдардың жұмысын қызмет басталғанға дейін де, қызмет көрсету барысында да кенеттен тексере алады.
Бұл өзгеріс бақылау механизмін жеделдетіп, ықтимал заңбұзушылықтарды дер кезінде анықтауға жағдай жасайды.
Мемлекеттік бақылау «Қазақстан Республикасындағы баланың құқықтары туралы» Заңымен реттеледі. Жаңартылған нормалар балаларға көрсетілетін қызметтердің сапасы мен қауіпсіздігіне қойылатын талаптарды күшейтеді.
ҚР Оқу-ағарту министрлігі Балалардың құқықтарын қорғау комитетінің төрағасы Насымжан Оспанова жаңа тәртіптің маңызын атап өтті.
«Кенеттен тексерулер балалардың қорғалуын күшейтеді. Енді нақты бұзушылық туралы сигнал түссе, уәкілетті орган өз шешімімен бірден тексеру жүргізе алады», — деді.
Еске салайық, 4 желтоқсанда Мемлекет басшысы мәдениет, білім беру, отбасы және мемлекеттік бақылау мәселелеріне қатысты заңдарға өзгерістер енгізу туралы заңға қол қойды. Жаңа нормалар 2026 жылдың 1 ақпанында күшіне енеді.
Дереккөз: Оқу-ағарту министрлігі
