Мемлекет басшысы Қасым-Жомарт Тоқаев Халықаралық бейбітшілік және сенім жылына, Халықаралық бейтараптық күніне және Түрікменстанның тұрақты бейтараптығының 30 жылдығына арналған халықаралық форумға қатысты.
Президент іс-шара барысында түрікмен халқының ұлт көшбасшысы Гурбангулы Бердімұхамедов пен Президент Сердар Бердімұхамедовті мерейтойлық датамен құттықтады.
Қасым-Жомарт Тоқаевтың айтуынша, Түрікменстанның бейтараптық саясаты Еуразия кеңістігінің тұрақтылығы мен орнықты дамуына маңызды үлес қосып келеді. Форумда көтерілген бастамалар бейтараптық ұғымына қазіргі кезең тұрғысынан жаңа көзқарас қалыптастыруға негіз болады.
Президент Түрікменстанның бейтарап позициясы елдің мәдени және рухани дәстүрлерімен үндесетінін атап өтті.
«Түрікмен классикалық әдебиетінің негізін қалаушы, Шығыстың көрнекті ойшылы Мақтымқұлы Пырағы: «Тыныштық болса ел өседі, әділдік болса сенім күшейеді» деген. Ұлы данышпанның дүниені терең таныған идеялары қазіргідей алмағайып халықаралық жағдайда да өте өзекті бола түскені сөзсіз», – деді Қасым-Жомарт Тоқаев.
Дереккөз: Ақорда
