Қазақстан медициналық туризм саласында Орталық Азиядағы жетекші бағыттардың біріне айналып келеді, деп хабарлайды QazMonitor. Өткен жылы отандық клиникалар 50 елден келген шамамен 80 мың шетелдік пациентке қызмет көрсеткен.
Қазақстандық медициналық туризм ассоциациясы болжамынша, алдағы жылдары емделу үшін келетін шетелдіктер саны жылына 300 мың адамға дейін жетуі мүмкін.
Денсаулық сақтау министрі Ақмарал Әлназарованың айтуынша, Қазақстандағы медициналық кластерге қызығушылықтың артуы ең алдымен емдеу құнының қолжетімділігімен байланысты. Диагностикалық және хирургиялық қызметтердің бағасы АҚШ пен Еуропамен салыстырғанда 5–10 есе арзан болуы мүмкін.
Сонымен қатар, елдегі клиникаларда қолданылатын емдеу хаттамалары еуропалық стандарттарға сәйкес келеді. Қазақстанда медициналық технологияларды бағалау жүйесі он жылдан астам уақыт бойы енгізіліп келеді.
Бүгінде елдегі тоғыз клиника Joint Commission International (JCI) халықаралық аккредитациясына ие. Бұл – пациент қауіпсіздігі мен медициналық қызмет сапасының әлемдік «алтын стандарты».
Шетелдік пациенттер арасында ең сұранысқа ие бағыттардың бірі – экстракорпоральдық ұрықтандыру (ЭКҰ). Бұл қызметтің танымалдығы оның қолжетімді бағасы мен сапасына байланысты. Сонымен қатар, Қазақстан жоғары технологиялы стоматологиялық қызметтер бойынша да шетелдіктерді тартып отыр.
