Бурабайда жаңа қысқы маусымның ашылуы өтті. Жаңа маусым Magic Burabay тұжырымдамасы аясында өтеді. Бұл туралы Ақмола облысы әкімдігі хабарлады.
Жобаның негізгі мақсаты келушілер үшін мерекелік атмосфера мен белсенді демалыс мүмкіндіктерін үйлестіру, деді әкімдікте. Биылғы маусымға дайындық барысында инфрақұрылымдық және логистикалық жаңартулар жүзеге асырылды. Туристерге сервистік қызмет көрсету сапасын арттыру мақсатында бірқатар жаңа жобалар іске қосылды.
Атап айтқанда Астана қаласындағы «Хан Шатыр» СОО мен халықаралық әуежайда арнайы ақпараттық аралшықтар орнатылды. Ал Щучинск қаласының теміржол вокзалында заманауи визит-орталық жұмысын бастады.
Аталған нүктелерде туристер курорттың демалыс бағдарламалары, алдағы іс-шаралар мен маршруттар туралы толық мәлімет ала алады. Бұл формат, әсіресе, шетелдік туристердің сапарын тиімді жоспарлауға бағытталған.
Бұған қоса, әкімдік негізгі демалыс локацияларын белгіледі. Олардың ішінде «Қазақстандық Лапландия» және Бурабай кентінің орталық алаңы: Мұнда мұз айдындары, сырғанақтар мен фотозоналар жабдықталған. Санта-Клаус резиденциясы, бұғылар мен хаски иттерімен өтетін экскурсиялар қарастырылған.
Сонымен қатар маусым барысында шаңғы жарыстары, Burabay Ice марафоны және қысқы балық аулау фестивалі сияқты бірқатар айтулы спорттық жарыстарды өткізу жоспарланып отыр.
Айта кетейік, мереке кезеңінде «Астана – Көкшетау» бағыты бойынша арнайы безендірілген жаңа жылдық пойыз вагоны қатынай бастады.
